Өдөр өдрийн нар
Өөр өөр өнгөтэй
Өчигдрөөсөө илүү
Өнөөдрийн нар өнгөтэй
Өнгөрсөн түүхээсээ
Ирээдүй нь илүү өнгөтэй
Маргаашийн нар
Өнөөдрөөс илүү өнгөтэй
Мандаж байгаа нь хүртэл
Нэг л гоё өнгөтэй
Магадгүй өглөө нар болохоороо
Бусдаасаа илүү өнгөтэй
Цамхараат тооныг хэрчиж тусах нь
Олон салаа өнгөтэй
Цагийн түүчээг давж тусах нь
Нэг л алтан өнгөтэй
Өнгө сүлэлдэхгүй гэрэлтэх нь
Дэндүү сайхан өнгөтэй
Өдөржин манддаг ч ганддагүй
Нэг л сайхан өнгөтэй
Дэлгээтэй үүдээр орж ирэх нь
Өглөөний өнгөтэй
Дээшилсээр байгаад тооноор гарах нь
Оройны өнгөтэй
Чам дээр тусах нь
Хайрын сайхан өнгөтэй
Цаашилсаар байгаад жаргах нь
Цаг хугацааны өнгөтэй
Нар над тусах нь
Сэтгэлд минь нэг л сайхан өнгөтэй
Наашилсаар байгаад дэргэд минь ирэх нь
Надад нэг л сайхан өнгөтэй
Үүлний цаагуур орсон ч
Бүдэгхэн шаргал өнгөтэй
Үүд хаалгаа хаасан ч
Тооноор тусах алтан өнгөтэй
Мөчлөг тоолон гэрэлтэх нь
Хорвоогийн сонин өнгөтэй
Мөнхөд тусах нь
Амьдралын амин өнгөтэй